![](https://img.bomboradyo.com/baguio/2020/11/pork.jpg)
BAGUIO CITY – Inlawlawag ti Department of Agriculture (DA) – Cordillera ti killaat a panagngato ti presyo dagiti karne ti baboy iti merkado publiko ti Baguio City ken kadagiti daddum a pagtagilakuan ditoy rehiyon.
Iti panakiyuman ti Bombo Radyo Baguio, inlawlawag ni Jerry Damoyan, dadaulo ti Agribusiness Marketing Assistance Division ti DA-Cordillera a ti agtutuloy a panagngato ti presyo dagiti karne ti baboy iti rehion ket gapu iti epekto ti outbreak ti African Swine Fever (ASF).
Kinunana a nakaru a naapektaran iti ASF dagiti lugar a pagtataudan ti adu a suplay ti karne ti baboy particular ti Isabela, Tarlac ken Pangasinan isut gapuna a manmanu laeng dagiti baboy a maisangsang-at iti siudad ti Baguio tapnu gatangen dagiti konsyumer.
Innayonna a bimmasit metlaeng dagiti nagtaraken ita ti baboy gaputa nadismayada iti panakalugida gapu iti ASF bayat a dadduma a hog raisers ket nagtarakenda laengen ti manok.
Inyunay-unayna nga awan ti koneksion ti agdama a pandemya iti panagngina ti karne ti baboy gaputa resulta daytoy ti kinakurang ti suplay ken panagngato ti pagkasapulan ti karne ti baboy ita a bulan.
Maibasar iti kaudian a panagwanawan ti opisinada, magatang ti kasim iti P290-P300 tunggal kilo bayat a magatang ti liempo iti P300-P320 tunggal kilo ditoy rehion Cordillera.
Immunan a naobserbaran iti panagwanawan ti Bombo Radyo Baguio iti meat section iti Baguio City Public Market a nangatngato ti presyo dagiti karne ti baboy sadiay no idilig iti baro a Suggested Retail Price iti karne ti baboy a pinirmaan ni Agriculture Secretary William Dar.