BAGUIO CITY – Aw-awisen ti Department of Tourism (DOT) – Cordillera dagiti tourism-related establishments iti rehiyon iti pananggundawayda iti libre nga akredistasyon ti negosyoda babaen iti ahensia.
Sigun kenni DOT-Cordillera regional director Jovy Ganongan, libre ti panang-accredit ti opisinada kadagiti nagduduma a tourism-related establishments ita a manarimaan ti community quarantine gapu iti pandemya.
Kinunana nga apaman a ma-accredit ti maysa a tourism-related establishment ket mabalinen nga agnumar daytoy iti nagduduma a benipisyo manipud iti gobyerno kas iti pa-seminar.
Inlawlawagna a tapnu makapagnumar iti nasao a diaya ti DOT, nasken a ti maseknan a tourism-related establishment ket addaan kadagiti empleyado a naipasidong iti panagsanay ken addaan abilidad ken makapasada iti inspeksion ti ahensia.
Imbinglay pay ni Ganongan nga ita a pandemya ket adu kadagiti tourism-related establishments iti rehion ti nagpa-akredit iti ahensia, pakairamanan dagiti transient houses, hotels, restaurants, dagiti pagmulaan nga addaan panggep nga agbalin a agri-tourism site ken dagiti tour guides.
Mangnamnama ni Ganongan a babaen iti panaka-adda ti akreditasyoon dagiti nagduduma a tourism-related establishments ket matulongan ti gobyerno dagitoy iti panakaital-o ti negosyo ken panakailako ti produkto dagitoy.
