Napasamak ti panagpaputok dagiti missiles iti baybay ti amianan a Pilipinas idi kalman bayat ti panangisayangkat dagiti puersa ti Estados Unidos ken Pilipino iti umuna nga integrated defense drills, sumagmamano nga oras kalpasan a kinuna ti China a nakumpirkarna a nakontrolna ti “reef” nga ibagbaga ti Pilipinas a kukuana.
Adun a bulan a pagsusupiatan ti Pilipinas ken China ti maipapan ti South China Sea, iti baet ti internasional a pangngeddeng nga awan ti ligal a nakabasaran ti panangipapilit ti China a kukuada.
Dumanon iti 17,000 a personnel ti nakipaset iti tinnawen a “Balikatan” exercises, nga iti agdama atawen ket maisayangkat ti a “full-scale battle scenario.”
Idi laeng Sabado, impakaamo ti Chinese state broadcaster a CCTV a ti coast guard ti pagilian ket nangipatungpal ti maritime control iti Sandy Cay,nga inawaganda a Tiexian Reef.
Ti bassit a sandbank a paset ti Spratly Islands, ket adda iti asideg ti Thitu Island, a maawagan metlaeng iti nagan a Pag-asa ken lugar ti maysa a pasilidad ti militar ti Pilipinas.
Iti agdama, awan pay ti pormal a sungbat ti gobierno ti Pilipinas seknan iti nasao a banag.
