BAGUIO CITY – Agtultuloy ti imbestigasiyon dagiti otoridad iti panakauram ti maysa a backhoe ti maysa a construction company ken panagpaputok iti paltog dagiti maatap a kameng ti New People’s Army (NPA) sadiay Sitio Bacwet, Pinukpok, Kalinga idi kalman.
Maibasar iti imbestigasiyon, nakita dagiti residente ti presensiya dagiti suspek iti tengngat rabii agingga iti alas dos ti parbangon idi kalman iti nasao a lugar.
Kinunada a nagpaputok iti paltog dagiti suspek sakbay nga inuram dagitoy ti backhoe a nakaparada iti asideg ti maysa a balay sadiay.
Iti met panagresponde dagiti otoridad, narekoberda ti sangapulo ket pito a basyo ti M16 rifle.
Atapen ni PSSupt. Brent Madjaco, Provincial Director ti Kalinga PNP nga aramid dagiti kameng ti NPA ti nasao nga insidente gaputa immunan a binotboteng dagiti rebelde dagiti nadumaduma nga establisiemento sadiay.
Nupay kasta, saan a patien ti militar a dagiti NPA ti akin-aramid kadagiti nasao nga insidente gaputa naiduma daytoy iti pannakauram ti dua a trak iti probinsia ti Benguet itay kallabes.
