BAGUIO CITY – Impetteng ni Mayor Benjamin Magalong a nasken a marippuog ti grupo a Cordillera People’s Liberation Army (CPLA).
Immunan a binabalawna ti panagparada dagiti kameng ti CPLA iti Session Road idi September 13 kagiddan ti panakalagip ti 1986 Mount Data Sipat Agreement.
Kinunana a nasdaaw daytoy idi nagmartsa ti grupo gaputa awan met ti permit a pinirmaanna para panagparada dagitoy.
Impettengna a nasken nga awanen ti CPLA gaputa kagiddan ti panakapirma ti 1986 Mount Data Sipat Agreement ket nawaswasen ti grupo gapu iti isusukoda iti gobyerno.
Innayonna a nagbalinen a Cordillera Forum on Peace and Development ti nagan dagiti orihinal a kameng ti CPLA.
Gapu iti daytoy, paimbestigaran ti mayor ti panagparada dagiti nagpabigbig a CPLA.
Paimbestigaranna pay ti naawatna a report seknan iti kampo nga ar-aramaten ti nasao a grupo gaputa saan a naaprobaran ti operasyon dagitoy. (-with Bombo Charles Nikko Limon)
