BAGUIO CITY – Maipawpawilen ti panangaramat dagiti tourist transports kadagiti kalkalsada ditoy siudad ti Baguio kas pagparadaan dagitoy.
Nailanad daytoy iti Executive Order No. 50 nga impaulog ni Mayor Benjamin Magalong a nangwaswas iti amin a pammilin ken dadduma pay a panangipalubos iti panag-aramat dagiti tourist transports ken UV Express kadagiti temporary staging/parking areas ken parapubliko a kalkalsada ti siudad.
Naibilin pay ditoy ti permanente a panangbakante dagiti tourist transports ken UV Express kadagiti nasao a disso.
Sigun kenkuana, addan ti naawatna a report seknan kadagiti colorum a van a mapalpalubusan nga agkarga ken agibaba iti pasahero kadagiti temporaryo nga staging area a nailatang a para kadagiti tourist transports ken UV Express nga addaan kasukat a gatad.
Impettengna a naabuso dagiti immunan a pagalagadan nangruna ta iti met linteg ket nailanad a nasken laeng nga adda ti bukodda a paradaan wenno terminal dagiti nasao a kita ti lugan.
Dinakamatna nga ita ket tila-tila ti pagparparadaan dagiti nasao a kita ti lugan a mangituntunda iti nakaro a panag-ilet iti trapiko ken peggad kadagiti pasahero.
Inyunay-unay pay ni Mayor Magalong ti panagsurot dagiti tourist transports ken UV Express, pakairamanan dagiti bus companies iti linteg iti umno a panagparada, panangilugan ken panangibaba kadagiti pasahero dagitoy.
Impettengna nga asinoman a driver dagiti nasao a kita ti lugan nga aglabsing iti nasao a pammilin ket matiliw ken mapatawan iti kaskenan a pannusa.
