BAGUIO CITY – Iyaw-awis ita ti City Health Services Office (CHSO) ti panagparehistro dagiti menor de edad nga agtawen ti 11 nga agpababa para iti panakabakuna dagitoy.
Sigun kenni City Epidemiology and Surveillance Unit Head Dr. Donnabel Panes, mabalinen nga agrehistro dagiti nasao nga ubbing iti online registration ti siudad a bakuna.baguio.gov.ph.
Kinunana a napalubusanen ti panagparehistro dagitoy nupay awan paylaeng ti schedule para iti panagpabakuna dagitoy.
Maibasar iti datos, addan ti 3,800 nga ubbing iti siudad nga agtawen ti 5 agingga 11 a nakarehistron iti online registration para iti bakuna.
Innayon ni Dr. Panes a puntirya ti siudad a mabakunaan kontra iti COVID-19 ti nasurok 40,000 nga ubbing bayat nga ur-urayenda ti panagparehistro ti nasurok 37,000 a menor de edad tapno magun-od ti nasao a puntirya.
