BAGUIO CITY – Al-allukuyen ti Department of Agriculture (DA) – Cordillera dagiti mannalon iti rehion tapnu agaplikar dagitoy para iti Good Agricultural Practices (GAP) Certification dagiti pagmulaanda.
Sigun kenni Atty. Jennilyn Dawayan, Regional Technical Director for Research and Regulations ti DA – Cordillera, agtultuloy ti panangital-o ti ahensia iti good agricultural practices tapnu maipasigurado ti kinatalged dagiti taraon ken ti panakaiyaplikar dagiti teknolohiya a saan a makadadael iti aglawlaw.
Kinunana nga agtultuloy ti panangsuportarda kadagiti mannalon agingga a magun-od ti GAP certification dagitoy.
Maibasar iti datus ti DA, dumanon iti 140 dagiti aktibo a GAP Certified Farms ditoy rehion Cordillera ken manamnama a ngumato kadagiti masungad a tawen.
