Agtultuloy ladta ti panagprotesta dagiti estudyante iti sumagmamano a unibersidad sadiay Estados Unidos maipapan iti kiddawda a panagsardeng ti giyera iti nagbaetan ti Israel ken dagiti militante ti Hamas.
Iti panakiuman ti Bombo Radyo kenni Teresita Totanes, Bombo International News Correspondent manipud Maryland, Estados Unidos, imbinglayna a kontrolado ti panagprotesta dagiti estudyante sadiay Maryland no pay kasta kadagiti daduma a lugar ket mas agresibo dagitoy.
Ngem, kinuna ni Totanes a “peaceful” dagiti maipatpatungpal a panagprotesta gapu iti panakadeploy dagiti pulis kadagiti sumagmamano a unibersidad bayat a manamnama a mangaramid ti gobyerno ti Estados Unidos ti pagannurotan maipapan iti panakasuspendir dagiti estudyante nga aglabsing kadagiti linteg dagitoy.
Kabayatanna, kiddaw dagitoy ti saan a panaglabes dagiti estudyante wenno ti panaglabsing dagitoy kadagiti linteg tapno awan ti madangran kabayatan ti ipatpatungpalda a panagprotesta.//M
