BAGUIO CITY – Balballaagan manen ti pulisya ti publiko nangruna dagiti addaan pwesto wenno paglakuan iti Baguio Blooms ken iti Session Road in Bloom kontra iti panagraira dagiti peke a kwarta.
Iti panakiyuman ti Bombo Radyo kenni PCI Marlo Evasco, dadaulo ti Station 7 ti Baguio City PNP, kinunana a nakaawatda iti reklamo seknan iti panagbayad kadakuada dagiti saan pay a nabigbig nga indibidual iti peke a kwarta, partikular ti sangaribo a pisos.
Dinakamatna a maysa a saleslady iti Session Road in Bloom ti nangawat iti peke a sangaribo a pisos manipud iti nagbalin a kustomer daytoy kalpasan a saan daytoy nga ammo a mangsukimat iti peke a kwarta.
Gapu iti daytoy, nainget nga ibalbalakadna ti panangsukimat dagiti addaan pwesto iti kwarta a maibayad kadagitoy tapnu saanda a mabiktima.
Sigun kenni Evasco, agarup lima a reklamo seknan iti peke a sangaribo a pisos ti naawat dagitoy a kadawyan a napasamak iti rabii.
Kabayatanna, agtultuloy ti panangipatungpal dagiti pulis iti Oplan Tambuli iti dua a market encounter iti sentro ti siudad tapnu mapalagipan dagiti nakabantay kadagiti pwesto ken kadagiti tattao tapnu agbalin a naridam ken naannad dagitoy.
