BAGUIO CITY – Balballaagan ti maysa a hotdog company ti publiko kontra kadagiti indibidual nga agpampammarang nga agents ti nasao a kompanya ken agrikrikos iti nagduduma a paset ti siudad a mangilaklako iti produkto dagitoy.
Sigun kenni Albert Cruz, sales supervisor ti hotdog company, nagreklamo iti opisinada ti innem nga indibidual mainaig iti panagrikrikus dagiti peke nga agents nga agilaklako iti hotdog a produkto ti kompanya ngem iti nangatngato a gatad no iti orihinal a presyo ti produkto.
Kinunana a kas maibasar iti reklamo dagiti biktima manipud sadiay Dontogan, Bakakeng Central ken sumagmamano pay a paset ti siudad ket adda ti impakita dagiti peke nga agents a company ID dagitoy ken addaanda pay iti price list.
Innayona a mangikarkari pay dagiti nasao a peke nga agents kadagiti dadduma a benepisyo kas iti electrical allowance ken addan dagiti biktima a gimmatang iti hotdog a lako dagiti nasao a peke nga agents iti gatad a P3,000 agingga iti nasurok P10,000.
Inlawlawag ni Cruz a ti tagilako dagiti peke nga agents a hotdog ket lehitimo a produkto a nagtaud iti kompanyada ngem dagiti laeng agpampammarang nga agents ti peke ken ti presyo dagitoy ket 50-70 percent a nangatngato ngem iti orihinal a panagilako ti kompanya.
Patien met dagiti biktima nga agar-aramat iti hipnotismo dagiti peke nga agents ti hotdog gaputa nabaelanda a nangallukoy kadagitoy a gumatang iti baet ti kinangina ti nasao a produkto.
