BAGUIO CITY – Naduktalan ti City Veterinary and Agriculture Office (CVAO) ti panagraira ti Equine Infectious Anemia (EIA) kadagiti kabalyo ditoy Baguio City.
Sigun kenni CVAO Veterinarian II Dr. Gladys Bantog, nagkolektarda ti blood samples kadagiti kabalyo ditoy siudad idi Setyembre 2020 kalpasan a naka-awatda ti report seknan iti panakatay dagiti kabalyo idi bulan ti Marso kabayatan ti panagrugi ti pandemya.
Dinakamatna a dumanon iti 17 ti nagpositibo iti EIA manipod iti 141 a kabalyo a nangalaanda ti samples sadiay Wright Park.
Innayonna a naduktalanda met laeng nga adda ti igges kadagiti rugit dagiti kabalyo iti insayangkatda a fecal sample ken swabbing.
Sigun kenni Dr. Bantog, awan ti agas ti EIA ken saan daytoy a maiyakar iti tao.
Nupay kasta, kinunana a nasken latta a maprebentaran daytoy babaen iti panangkontrol kadagiti horseflies, panagpurga kadagiti kabalyo ken panagdalus wenno disinfection kadagiti kulungan dagiti kabalyo.
Naamuan a maiyakar ti EIA kadagiti kabalyo babaen iti kagat dagiti insekto.
