Sinuspindir dagiti imbestigador idiay South Korea ti panagreggetda a mangipatungpal iti arrest warrant kontra kenni President Yoon Suk Yeol idi kalman, sumagmamano nga oras kalpasan ti panagsusupiat dagiti otoridad a panangpadasda nga ibalud ti nasao a dadaulo kasaruno ti panangideklarana iti martial law.
Sigun iti Corruption Investigation Office (CIO), agarup walo a kameng ti pulis ken imbestigador ti simrek iti presidential compound idiay Seoul iti tapno alaenda ni Yoon iti kustodia para iti panagsaludsod.
Nupay kasta, nalapdan dagitoy babaen ti “human wall” ti agarup dua gasut a suldado ken kameng ti presidential security detail, sigun iti Corruption Investigation Office.
Gapu iti dayta, saan paylaeng a naituloy ti pannakakemmeg ti nasao a dadaulo para iti kinatalged dagiti tattao iti nasao a lugar, sigun iti statement.
Ti warrant ket balido agingga Enero sais, ket agtalianed nga epektibo ken mabalin a mailaylayon.
Maipalagip nga indeklara ni Yoon ti martial law idi napalabas a bulan ngem saan a naayatan daytoy dagiti umili ti South Korea, ken dagiti kameng ti bukodna a partido nu sadinno, pimmaborda a suportaran ti butos ti impeachment kalpasan ti panagkedkedna nga agikkat.
