Agtultuloy latta ti panagregget nga ar-aramiden dagiti otoridad ken volunteers iti panagsapul ti lalaki a nagaburan ti panagregaay ti daga idiay Talinguroy, Wangal, La Trinidad, Benguet.
Iti interview ti Bombo Radyo kenni Roderick Awingan, Mayor ti La Trinidad,Benguet, kinunana a na-mobilize ti La Trinidad Municipal Police Station, MDRRMO, kaduada ti nagduduma a volunteers manipod kadagiti reservists, kameng ti BFP-La Trindad, dagiti kabagian mismo ti mapukpukaw, dagiti dadduma nga opisial ti La Trinidad, dagiti residente ken dadduma pay iti nasao a lugar itay paylaeng nabiit.
Iti inisial nga imbestigasion dagiti otoridad, kinuna ni Awingan a rimmuar ti lalaki iti parbangon idi Hulyo 25, 2025 tapno isimpa ti kanal ti garden daytoy, ngem kellaat a nargaay ti daga nga asideg iti pagmulmulaanda.
Kadua ti mapukpukaw a lalaki ti anakna idi napasamak ti insidente.
Idi laeng kalman, nagturong mismo ni Awingan iti nakapasamakan ti insidente ket naimatanganna nga agtultuloy ti panagkali a maisaysayngakat babaen iti heavy equipment a naipabulod kadakuada tapno ad-adda a naparpartak ti panagsapul iti lalaki.
Kinunana pay a rinugianda metlaeng a “sinuyod” ti creek manipod ngato a paset agingga iti Lower Wangal, La Trinidad.
Maipalagip a dagos a nangisayangkat ti search and rescue operations dagiti kamend ti MDRRMO, pulisya ken dadduma pay idi naamuanda ti napasamak.
