“Kalunus-lunos,” kasta ti panangiladawan ti maysa a mannursuro iti agdama a kasasaad dagitoy iti pagilian a Pilipinas.
Iti panakiuman ti Bombo Radyo kenni Joel Capulong,miembro iti Alliance of Concerned Teachers- Cordillera, agtaltalinaed nga maud-udi ti maaw-awat dagiti mannursuro a pamastrekan iti baet nga adu a trabaho ti kasapulanda nga ubraen.
Sigun kenni Capulong,ti sahod dagitoy ket saan nga umdas ken nababbaba ngem iti intuding ti National Economic and Development Authority (NEDA) a living wage.
Malaksid iti dayta, maysa pay a pakaseknanda ti adu unay a bilang dagiti estudyante nga isuroda iti tunggal klase nu sadino, adda dagiti gundaway a dumanon daytoy iti nasursurok ngem uppat a pulo,iti baet a ti international standard iti teacher-student ratio ket one is to twenty-five(1:25).
Sigun kenni Capulong, nagkiddaw dagitoyen nga uray agbalin a one is to thirty-five ti teacher-student ratio ngem adda dagiti gundaway a maar-artapan latta ti nadakamat a bilang a maysa kadagiti rason iti saan a naan-anay a panakaipaay iti dekalidad nga edukasyon iti pagilian.
Mainaig iti dayta, maysa pay kadagiti pakaseknan dagitoy ti kinakurang dagiti silid-pagadalan ken dagiti mannursuro.
Gapu iti dayta,kinuna ni Capulong a nupay maapresiarda ti panagregget ti gobyerno tapno solusyonan ti pakaseknan dagiti mannursuro,adayo pay daytoy iti tariggay dagiti mannursuro a panakapasayaat ti kasasaadda.//Bombo Rob Dominguez
