BAGUIO CITY – Balballakadan ti Baguio City Police Office (BCPO) – Station 7 dagiti nagannak iti panangbantayda a naimbag kadagiti annakda manipud iti impluwensia dagiti gangs.
Iti interview ti Bombo Radyo Baguio, kinuna ni Police Major Marlo Evasco, dadaulo ti BCPO-Station 7 nga adda ti nawanawananda a panagawis iti social media tapnu makipaset dagiti agtutubo kadagiti gangs.
Dinakamatna a maysa kadagiti agrekrekrut ket ti sigud a miembro ti maysa a gang a mangbibiag iti nasao a gang babaen iti panagawis daytoy kadagiti agtutubo babaen iti social media.
Sigun kenkuana, adda ti oras nga iruruar dagiti nasao a gangs tapnu agkikita iti sentro ti siudad.
Gapu iti daytoy, ibalbalakadna ti nainget a panangbantay dagiti nagannak kadagiti annak dagitoy tapnu saanda a maiyaw-awan ken maipasubo kadagiti dakes a grupo.
Innayonna a nainget met ti panagpatrolyada kadagiti kadawyan a turturongen dagiti agtutubo tapnu maipasigurado a mabantayan dagitoy.
