BAGUIO CITY – Mapalpalagipan dagiti residente idiay Bokod, Benguet nga agridam tunggal adda ti manamnama a panagdalapos ti bagyo gapu iti narisgu a nagsaadan ti pagtaengan dagitoy kas iti rangkis.
Iti panakiuman ti Bombo Radyo kenni Bokod Mayor Thomas Wales, nakasagana dagitoy ken dagiti disaster response teams kasta metten dagiti daduma pay nga alikamen nga aramaten dagitoy iti panagresponde apaman nga adda ti agkasapulan ti tulong kadagiti constituents dagitoy.
Malaksid iti dayta, kinunana a napagtalinaed dagitoy a silulukat dagiti kalsada iti masakupanda nga isu a nagdalanan dagiti motorista idi naipaserra ti paset iti Halsema Highway gapu iti panagreggaay iti daga nga intunda tri naglabas a bagyo.
Iti sabali a bangir, imbinglay ti mayor a nakaalerto dagiti amin a barangay iti nasao a munisipyo seknan iti panagraira ti dengue.
Sigun kenni Mayor Wales, awan pay ti nailista dagitoy a kaso iti ipupusay gapu iti nasao a sakit ken bimmaba ti bilang dagiti maap-apektaran.//BomboRob Domiguez
