BAGUIO CITY – Ibalbalakad ti Cordillera Regional Disaster Risk Reduction Management Council (CDRRMC) ti panagridam ti publiko gapu iti posible nga epekto ti Bagyo a Falcon ken ti agtultuloy a mapaspasaran a Southwest Monsoon ditoy rehion Cordillera.
Insingasing ti ahensia ti regular a panangmonitor dagiti umili kadagiti kaudian a weather updates tapno ammoda ti sasaaden ti panawen.
Sigun pay iti CDRRMC, nasken a bayat a nasapa pay ket agisagana dagiti umili iti maaw-awagan a Go Bag wenno family survival kit.
Nasken met laeng a mangala dagiti umili kadagiti emergency contact numbers tapno agtalinaed latta ti komunikasion dagitoy iti panawen ti kalamidad.
Kiniddaw pay ti ahensia ti pannakipaset dagiti umili no adda ti maipatungpal a pre-emptive evacuation.
Nabalakadan dagiti agnanaed kadagiti napeggad a lugar a dagus dagitoy nga agbakwit ken napalagipan dagiti motorista a mangsukimat iti kasasaad ti luganda ken liklikanda ti agbiahe no napigsa ti tudo ken no adda ti bagyo.
