BAGUIO CITY – Maibalballaag manen kadagiti amin a nagannak a bantayanda a nalaing dagiti anakda.
Kasaruno daytoy ti kapadasan ti maysa nga ubing idi Mayo 25 nga imbinglay dagiti nagannakna manipud Baguio City.
Sigun kenkuana, agmaymaysa a magmagna ti anakna iti paset ti insular iti oras ti 11:30 am kalpasan ti klasena iti Baguio Central School.
Nupay kasta, naobserbaranna a sursuroten daytoy ti saanna nga am-amo a lalaki.
Kinasarita ti nasao a lalaki ti ubing ken kinunana a binilin daytoy ti inana nga agsundo kenkuana.
Impakita pay ti lalaki ti saan a pamilyar a numero nu sadino imbagana iti ubing a kukua mismo daytoy ti inana.
Nupay kasta, ammo ti nasao nga ubing ti pudno a numero ti inana ken ti lolana isut gapuna a saanna nga inkankanu ti nasao a lalaki ken nagtuloy a nagnagna agingga a nakadanonda iti Otek Square.
Gapu iti kina-alerto ti ubing, ginundawayan nga intarayan ti lalaki ken sinumrek iti maysa a hardware a tagikua ti kabagyanna a masarakan iti nasao a lugar.
Kabayatanna, pagladladingetan met ti maysa nga ama manipud Baguio City ti nagbalin a kapadasan ti anakna idi malem kalman.
Sigun iti daytoy, paawid ti anakna idi killaat a dinangran dagiti agtutubo nga awanan iti umno a rason.
Pinagyamananna gaputa nakataray ti anakna ken nagdawat iti tulong manipud kadagiti otoridad.
Nupay saan a nabigbig dagiti babbai a nangdangran iti anakna ket pagyamyamananna ti natalged a panagawid daytoy babaen iti tulong dagiti police personnel.
Gapu iti daytoy, kidkiddawenna kadagiti padana a nagannak a suroenda dagiti annakda iti napintas a panag-ug-ugali tapno saanen a maulit ti kapada nga insidente.//
