BAGUIO CITY – Ibilbilin manen dagiti Local Disaster Risk Reduction and Management (DRRM) Councils ti panagridam dagiti umili iti rehion Cordillera kagiddan ti mapaspasaran ita a napigsa ken nabayag a panagbayakabak ti tudo.
Kasaruno daytoy ti panagbakwit ti pito a pamilya a bukbuklen ti 45 nga indibidual sadiay Barangay Maling, Balbalan, Kalinga kalpasan a naan-anay a nagaburan ti maysa a pagtaengan sadiay idi rabii ti Lunes nga intunda ti napigsa a panagtudo a napasaran sadiay kadagiti napalpalabas nga aldaw.
Sigun kenni Balbalan Municipal DRRMC Officer Pearl Tumbali, adda paylaeng iti barangay hall ti pamilya ni Deldin Balangui nga agtagikua iti nagaburan a balay bayat a nagsublin iti bukod a pagtaengan dagiti kaaruba dagitoy.
Kinunana a naipaayan metten iti relief goods dagiti naapektaran a pamilya.
Innayonna a naduktalan iti panagsukimatda nga awan ti pagayosan ti danum iti asideg ti balay isut gapuna nga ad-adda a limmukneng ti daga agingga a nargaay ken nagaburan ti istruktura.
Sigun pay kenkuana, agtultuloy ti panagwanawan ken panagdalusda kadagiti kangrunaan a kalsada sadiay gapu iti saggabassit a panagreggaay a mapaspasaran sadiay Kalinga.
