BAGUIO CITY – Ibalbalaag manen ti Security and Exchange Commission-Baguio ti panagridan ti publiko kontra kadagiti scammer a mangidiadiaya iti online investment programs.
Iti panakiyuman ti Bombo Radyo Baguio, imbinglay ni Helen Veryan, Public Information Officer ti SEC-Baguio nga ado nga investment entities ti agop-operate kadagiti online platforms ngem kaadoan ket saan a lehitimo ken rehistrado.
Inaklonna nga ado dagiti maguyguyogoy kadagiti maidiadiaya iti online gaputta nalaka a pagkwartaan.
Gapu iti daytoy, ibalbalakadna iti publiko a siguradoenda no lehitimo ken rehistrado dagiti investment entities iti Security and Exchange Commission sakbay nga agtalek kadagitoy.
Dinakamatna a dagiti lehitimo nga investment entities ket adda ti maipakitada a secondary licence kadagiti kliyente wenno kustomer kas pamaneknek nga otorisadoda nga agkolektar iti investment.
Inyunay-unayna a saan nga umdas ti primary license tapno maibaga a lehitimo ti maysa nga investment entity gaputa umuna laeng daytoy a proseso iti panaglukat ti negosyo.
Inlawlawagna a no saan a rehistrado ken awan ti permit ti maysa nga entity manipud iti Security and Exchange Commission ket saan a makamat ken mapasungbat dagiti indibidual nga adda iti likodan daytoy iti kanito nga adda ti agtaud a problema.
Impaganetget manen ni Veryan a nasaysayaat no ikonsulta pay nga umuna iti opisina ti SEC ti nagan dagiti entity tapno masukimat no rehistrado ken lehitimo dagitoy a mangipatungpal iti aniaman a transaksion.
