BAGUIO CITY -Ipalpalagip manen ti Bureau of Fire Protection ti panagridam ti publiko kagiddan ti iyaasideg ti summer season.
Iti interview ti Bombo Radyo Baguio, imbinglay ni BFP-Baguio Community Relations Officer SFO1 Kathleen Guinyawan nga agtultuloy ti programa ti ahensia tapnu malapdan ti panakapasamak ti uram nangruna ta marambakan ita a bulan ti Fire Prevention Month.
Inaklonna a nalimitaran ti panakaipatungpalda ti programa kontra iti uram gapu iti dakkel nga epekto ti pandemya.
Nupay kasta, impettengna a mangrugi metten ti panangidiaya ti ahensia ti adu a panagsanay kadagiti babbarangay ken organisasyon kasaruno ti panakaipasidong ti Baguio City iti Alert Level 1.
Inayonna a mangipatungpalda metlaeng ti surprise inspection kadagiti establishemento tapno maamoan no agtultulnogda kadagiti naituding a pagalagadan.
Kaadoan kadagiti nawanawanan a nilabsing dagiti establishemento iti siudad ket ti kaawan ti fire exits.
