BAGUIO CITY – Ibalbalakad ti Regional Anti-Cybercrime Unit ti Police Regional Office Cordillera ti panagridam ti publiko kontra kadagiti mananggundaway ken manangngallilaw a tattao kasaruno ti panakailista dagitoy ti nagduduma a kaso ti panag-abuso babaen iti online ita a tawen.
Sigun kenni PLt.Col. Divine Mencio, nakailistada iti lima a nagduduma a kaso partikular ti online libel, photo and video voyeurism ken death treat.
Kinunana a ngimmato ti kaso a nailista ita a tawen no idilig iti dua a kaso a nairekord idi napalabas a tawen.
Dinakamatna nga iti online libel ket nakaawatda ti reklamo seknan ti panangipablaak wenno panangipatulod ti suspek iti saan a nasayaat wenno nasasakit a pannarita kontra iti biktima babaen iti social media, pakairamanan ti saan a panakaipatulod wenno panakaideliver dagiti produkto a ginatang dagiti biktima babaen iti online nga immuna a binayadanda babaen iti bangko.
Innayonna a nakaawatda metlaeng ti reklamo seknan ti panakaiwaras ti lamo-lamo a ladawan ken panag-pangta iti biag.
Inyunay-unayna a dakkel ti epekto ti pandemya iti panagngato ti kaso ti panag-abuso iti online gaputa masansan ti panagtalinaed dagiti tattao iti pagtaengan dagitoy ken nagbalin a liwliwada ti panag-usar iti social media.
Nupay kasta, palpalagipan latta ni Mencio ti publiko iti panagaramatda iti social media iti napintas a wagas ken sukimatenda a nalaing dagiti pakitatransaksionanda a website tapnu saanda a maloko wenno maallilaw.
