Inaprubaranen ni President Ferdinand Marcos Jr., ti panaglukat ti klase inton Hulyo 29, 2024 para iti school year 2024-2025 ken agleppas daytoy inton Abril 15, 2025.
Ti nasao nga addang ket rugi ti in-inot a pannakaisubli ti old school calendar.
Idi kalman ket kinasarita ni President Marcos ni Vice President ken Department of Education Secretary Sara Duterte maipapan iti dua nga option tapno maisubli ti June-March nga school calendar.
Ti umuna nga option ket ti 180 school days ken 15 in-person Saturday classes bayat a ti maikadua nga option ket ti 165 school days ken awan ti in-person Saturday class ngem agpada nga agleppas ti school year inton Marso 31, 2025.
Nupay kasta, sigun kenni President Marcos, kurang ti 165 days a pag-eskwelaan dagiti ubbing ken saanna a kayat a sumrek dagiti estudyante iti klase tunggal Sabado.
Gapu iti daytoy, kinuna ti Presidente nga imbes nga agleppas ti school year inton Marso 31, 2025 ket nasken nga iadjust wenno ilaylayon daytoy ti Department of Education inton Abril 15, 2025 tapno makompleto dagiti estudyante ti 180 nga school days ken saandan a kasapulan a sumrek tunggal Sabado.
Para iti school year 2025-2026, maisublin ti old school calendar nu sadino sumrek dagiti estudyante iti klase iti bulan ti Hunyo 2025 ken agleppas daytoy iti bulan ti Marso 2026 iti sumaruno a tawen.
