BAGUIO CITY – Impanamnama ti lokal a gobyerno ti Baguio City ti panag-operate manen ti Loakan Airport mangrugi inton Disyembre 25.
Iti interview ti Bombo Radyo, kinuna ni Mayor Benjamin Magalong, agtultuloy ti rehabilitasyon ti nasao nga airport tapno mailukat daytoy iti commercial flight.
Dinakamatna nga itay kallabes ket nakasaritana dagiti opisyales ti Civil Aviation Authority of the Philippines, Philippine Airlines, Department of Tourism ken Department of Transportation para iti napartak a rehabilitasyon.
Sigun iti Mayor, 50 milyon pesos ti inisyal a pundo a mabusbos iti rehabilitasyon ti terminal ti Loakan Airport.
Ti flight a mabalin nga iyakomodar ti Loakan Airport ket paturong sadiay Cebu, Iloilo, Davao ken Cagayan De Oro.
Impetteng ti opisyal nga uppat ti agbalin a flight iti makalawas ken mangrugi ti biyahe iti alas nuebe wenno alas dies ti agsapa.//CaraS.
