BAGUIO CITY – Impanamnama ti Lang-ay Festival Organization nga umdas ti bilang dagiti hotels sadiay Bontoc, Mt. Province a mang-akomodar kadagiti sumangbay a turista iti panakaramabak ti nasao a pestibidad inton Abril.
Sigun kenni Paulino Tumapang Jr., chairperson ti Lang-ay Festival Organization, mabalinen ti nasapa a “booking” ken panagpareserba dagiti turista a kayatna nga agbuya iti maangay a pestibidad.
Nupay kasta, iti kanito nga agkurang dagiti hotels ket mabalinda a makisarita kadagiti dadakkel nga establishimento sadiay a temporaryo a mang-akomodar dagiti agsangbay a bisita.
Malaksid iti dayta ket mabalin met laeng nga makikoordinarda kadagiti hotels sadiay Sagada tapnu sadiay nga agdagus dagiti dadduma.
Iti agdama ket agtultuloy ti koordinasyon dagitoy iti Provincial Toursim Office ti Mt. Province para iti umadanin a panakarambak ti Lang-ay Festival.
Ti tema ti selebrasyon ita a tawen ket “Reminiscing and Fostering our Cultural Integrity.”
