BAGUIO CITY – Inyunay-unay manen ti ama ti Baguio ti kinapateg ti panagsalwad kadagiti watershed a pagtataudan ti suplay ti danum ditoy siudad.
Sigun kenni Mayor Benjamin Magalong, ur-urayen laengen ti lokal a gobyerno ti siudad ti desisyon ti korte seknan iti naipaulog a temporary restraining order kadagiti agtagikua dagiti establishimento a nang-okupar iti Busol Watershed.
Maipalagip a maysa ti Busol Watershed kadagiti kadakkelan a pagtataudan ti suplay ti danum ditoy siudad.
Innayonna a makikokoordinardan iti Department of Environment and Natural Resources – Cordillera tapnu maamuan no adda pay dagiti istruktura sadiay a mabalin a maipasidong iti demolisyon.
Inlawlawag ti mayor a marikrikna manen ita ti panagkurang ti suplay ti danum isut gapuna a kasapulan a matutukan ken masalakniban dagiti watersheds.
Impettengna a saan a mabalin a mabaybay-an dagiti pagtataudan ti suplay ti danum gapu ta dakkel ti agbalin nga epekto daytoy.
Innayonna pay nga agkita ti lokal a gobyerno iti dadduma a wagas no kasano a manayonan ti suplay ti danum ditoy siudad.
