BAGUIO CITY – Mangipatungpal ti panagsanay ti Sangguniang Kabataan Federation (SKF) ti Baguio City kadagiti agtutubo nga agserbi kas “peer councilors”.
Sigun kenni Councilor Levy Lloyd Orcales, presidente ti SKF-Baguio, dagiti agtutubo a maipasidong iti panagsanay ti tumulong iti panakaisayangkat ti ‘teen counseling’ kadagiti agtutubo a makapaspasar ti mental health problem, pakairamanan ti depresyon.
Nabukel ti programa kasaruno ti impormasyon a kaaduan kadagiti umaw-awag ita iti hotline para iti mental health ti Baguio ket dagiti agtutubo.
Kinunana a nasken a maipaayan dagiti nasao nga agtutubo iti umno ken napartak a tulong.
Sigun kenkuana, dakkel a banag no agkatawenan dagiti agtutubo nga agkasapulan ti tulong ken dagiti mangbalakad kadagitoy gaputa agingga ita ket adda latta ti panagbain dagiti agtutubo no natataengan ti pangiyebkasanda iti pakaseknanda.
Impanamnama ni Orcales nga adda latta dagiti nakabantay a doktor wenno eksperto ti mental health a mangipaay ti panangigiya kadagiti ‘teen counselor’ tunggal adda ti agpatulong nga agtutubo kadagitoy.
