Posible a mangrugi ti panagsanay dagiti agserbi a training officer iti probinsya ti Benguet para iti 2025 midterm elections inton sumaruno a bulan wenno inton Enero inton sumaruno a tawen.
Iti pannakiuman ti Bombo Radyo kenni Atty. Elenita Julia Tabangin Capuyan , Provincial Election Supervisor-Benguet, kinunana nga umun-una paylaeng nga agsanay dagiti agserbi kas training officer sakbay a dagiti mannursuro nga agbalin kas electoral board para iti umadanin nga eleksyon.
Daytoy ket tapno naan-anay a mapakaamuan dagiti training officer tapno ammo-da dagiti pamay-an kasta metten dagiti kasapulan nga isuroda kadagiti agbalin nga electoral boards.
Sigun kenkuana, posible met a mangrugi ti panagsanay dagiti mannursuro nga agbalin kas electoral board inton Pebrero, inton sumaruno a tawen.
Kabayatanna, pagsagsaganaan met dagitoy ti final testing para kadagiti maaramat a makina bayat ti local ken national election inton Mayo, inton sumaruno a tawen.
