Kinumpirmar ni Benguet COMELEC Election officer Atty. Elenita Julia Capuyan Tabangin a nagsanod ni Adam Yap iti kandidaturana para iti kina-kongresista iti Benguet Province.
Iti pannakiuman ti Bombo Radyo kenkuana, kinuna nga immuna a nangipila daytoy iti statementna idi kalman sakbay a nangipila daytoy iti Certificate of Withdrawal ita laeng nga aldaw.
Impetteng pay ti nasao nga opisyal nga awan ti naipakaammo kadakuada a rason iti panagsanod daytoy.
Kabayatanna, maipalagip a ni Adam Yap ti kaunaan a nangipila iti kandidaturana para iti kina-kongresista idi Oktobre 1 ngem imbabawina metlaeng daytoy.
Gapu iti daytoy, uppat laeng ti nabatbati a kandidato iti nasao a posisyon para iti 2025 midterm elections.
Karaman ditoy da incumbent Congressman Eric G. Yap, Juanito A. Siddayao, Jerome E. Wakat ken Ericson Felipe.
