Inlawlawag ni Wilson Bumay-et Jr., presidente ti Jeepney Federation Baguio – Benguet nga impasardengdan ti panagsalog dagiti jeep idiay SLU-SVP Old Site, Bakakeng Central, Baguio City gapu ta adun dagiti agparparada a pribado a lugan iti baet nga nailet ti kalsada sadiay.
Iti panakiuman ti Bombo Radyo kenni Bumay-et, mabalinda a patgan ti kiddaw dagiti residente laketdi aramiden met ti nasao a barangay ti pagrebbenganda kas ti panagpaikkat kadagiti nakaparada a lugan sadiay ken panangipatungpalda ti road widening.
Malaksid iti dayta, naipasardeng ti panagsalog dagiti jeep iti nasao a lugar gapu ta saan metlaeng a supsuportaran dagiti pasahero dagitoy nu sadino saanda nga aglugan kadagiti agparada a jeep sadiay gapu ta nabayag dagitoy nga agkarga sigun kadakuada.
Gapu iti dayta, kidkiddawen met ni Bumay-et kadagiti residente a suportaranda dagiti jeepney nga agparada it nasao a lugar.
Kabayatanna, kinuna ni Bumay-et a ninamnamana a nasungbatanen amin a saludsod dagiti residente bayat ti naangay a general assembly iti nasao a barangay.//Bombo Rob Dominguez
