BAGUIO CITY – Posible a makasuan ken mawaswas ti prangkisa dagiti jeepney drivers ken operators nga agsingsingir iti nangato unay a plete.
Iti interview ti Bombo Radyo Baguio kenni Councilor Benny Bomogao, chairman ti Committee on Public Utilities, Transportation and Traffic Legislation iti City Council, kinunana a ti panagsingir iti nangatngato a gatad no iti naituding a minimum fare ket panaglabsing iti fare matrix nga impaulog ti Land Transportation Franchising and Regulatory Board (LTFRB).
Innayonna nga adda latta dagiti maseknan nga umili nga agturturong iti opisinada tapnu idanun ti pakaseknan iti nangato a plete a singsingiren dagiti sumagmamano a ruta dagiti parapubliko a jeep iti lokalidad.
Naamuan nga adda ti katulagan a pinirmaan dagiti barangay officials ken dagiti asosasyon dagiti operators ken drivers dagiti sumagmamano a ruta dagiti parapubliko a jeep a mangipalpalubos iti panakaipangato ti plete kadagitoy kas sadiay Camp 8, Poliwes ken Crystal Cave.
Gapu iti daytoy, impetteng ni Bomogao a mabalin a mamulta dagiti nasao nga asosasyon iti P10,000 gapu iti panaglabsingda iti prangkisa ken posible a mawaswas ti prangkisa dagitoy.
Inlawlawagna nga adda ti fare matrix nga impaulog ti LTFRB a nasken a suruten dagiti parapasahero a jeep.
Nupay kinuna ti konsehal a maawatanda dagiti operators ken driver dagiti parapasahero a jeeps gapu iti agdama a pandemya, inyapelana met ti saan dagitoy a panaglabsing iti linteg.
Inyunay-unayna a maipalubos met ti panakaikabil ti tip box kadagiti luganda tapnu sadiay a mangikabil dagiti agbalin a pasahero iti kayatda nga ipaay a tip.
