BAGUIO CITY – Pagparparikotan ita ti Drug Enforcement Unit ti Baguio City Police Office ti panagsubli-subli dagiti makemkemmegda a drug personalities iti iligal nga aramid dagitoy.
Sigun kenni Police Major Nicodemus Olarte III, action officer ti nasao nga unit ti pulisya, dumanon iti 10 a drug personalities ti agdama a bambantayanda gapu iti panagsubli-subli dagitoy iti iligal nga aramid kas iti panagilako ken panagaramat iti iligal a droga.
Kinunana a nakemmegen dagiti nasao nga indibidual iti dua wenno tallo a daras gapu iti iligal a droga ngem nakaruar dagitoy gapu iti plea bargaining.
Dinakamatna a wanwanawananda dagiti sumuksuko ken matiltiliwanda nga agar-aramat iti plea bargaining tapnu makaruwar iti pagbaludan babaen metlaeng iti panakikoordinarda kadagiti pulis ken kadagiti barangay officials.
Innayon pay ni Major Olarte a maysa a parikotda ti kinakurang ti pasilidad para iti rehabilitasyon dagiti makemkemmegda a drug personalities.
Kinunana a gapu iti daytoy ket panggepda a mangisayangkat ti rehabilitasyon iti uneg a mismo ti Baguio City Jail. (-with Bombo Nikki Agsiweng/ Bombo Brigitte Marcasi)
