BAGUIO CITY – Agtultuloy ti panagrikos ti City Tourism Office ken dadduma pay a maseknan nga opisina ti lokal a gobyerno ti Baguio kadagiti transient houses ken accommodation establishments ditoy siudad tapnu sukimaten no addaan dagitoy ti akredistasyon nga agakomodar kadagiti turista.
Sigun kenni City Tourism Officer Engr. Alec Mapalo, babaen iti inspeksion ket maamuan no asino kadagiti accommodation establishments iti siudad ti addaan ti akreditasyon sakbay ti panangipaayda iti ceritificate of compliance dagitoy.
Kinunana a dagiti maipaayan iti certificate of compliance ket mabalinen nga agawat kadagiti turista.
Dinakamatna nga ita ket dumanon iti 374 dagiti transient houses iti siudad a naipaayanen ti certificate of compliance nupay inaklonna a gapu iti kaadu dagitoy ket saan nga amin ket addaan ti regular a bisita.
Nupay kasta, kinuna a nasaysayaaten ti nasao a sitwasyon gaputa adda ti pagrugyan dagiti operators dagiti transient houses ken accommodation establishments kabayatan ti agdama a pandemya.
