Inwaragawag ni Public Works Secretary Manuel Bonoan a manarimaan ti pannakaaramid iti detalyado a listaan, kasasaad ken gatad a naaramat kadagiti flood control projects.
Kasaruno daytoy iti impaulog ni President Ferdinand Marcos Jr. a bilin kabayatan ti State of the Nation Address (SONA) daytoy, a mangisayangkat ti nasao nga ahensia iti audit kadagiti amin a flood control projects iti pagilian.
Maireport amin dagiti status dagiti proyekto a naaramid iti napalabas a tallo a tawen.
Nupay kasta, kinuna ni Prof. Manuel Leyco, maysa nga economist ken kameng ti Center for People Empowerment and Governance, a saan nga umno a ti DPWH ti mangisayangkat iti audit ken review kadagiti proyekto, nangruna a karaman dagitoy iti alegasion seknan iti kurapsion.
Gapu iti dayta, insingasing ni Leyco a mangbukel ti presidente iti independent committee a mangsukimat kadagiti flood control projects nga ipatpatungpal ti DPWH.
Kabayatanna, impakaammo ni Public Works Secretary Bonoan a dumanon iti 15,556 a flood control projects ti naituding a maiplementar manipud 2022-2026.
Iti nasao a bilang dagiti proyekto, 9,856 laeng dagiti naileppas bayat a 5,700 ti posible a maileppas iti nagbaetan ti 2025 ken 2026.
Iti sidong ti 2025 General Appropriations Act (GAA), maikadua ti DPWH kadagiti naipaayan iti dakkel a pondo a dumanon iti P1.007 trillion, maisaruno iti P1.055 trillion a pondo ti Department of Education.
