Panggep a patibkeren wenno papigsaen ni Marvin Sicomen, Head Coach ti Kickboxing dagiti Batang Pinoy Benguet Delegates ken ti kasasaad ti isports iti probinsya ti Benguet.
Iti exclusive interview iti Bombo Radyo kenkuana, patien daytoy a nu makaiyawid dagiti agarup tallo gasut nga atleta manipud iti probinsya ti Benguet iti nasayaat a resulta iti pannakibalubalda iti Batang Pinoy ket ad-adda wenno ad-addu dagiti opisyales manipud iti municipal ken provincial local government iti probinsya ti Benguet ti maallukoyda a mangipaay iti sponsorship kadagiti atleta.
Sigun kenni Sicomen, nangrugi dagiti Benguet athletes a nag-ensayo idi bulan ti Setyembre idiay Wangal, La Trinidad ngem,agparparikut dagitoy iti pinansiyal nga aspeto para iti panakasupusop amin dagiti aktibidad dagiti atleta a makibalubal.
Innayon pay ni Sicomen a sigud daytoy a coach iti Baguio City nu sadino dagitoy ti kanayon a champion iti Batang Pinoy competition ngem idi nakita daytoy ti sitwasyon dagiti Benguet athletes, nag desisyon daytoy nga agbalin a coach dagiti atleta iti probinsya ti Benguet partikulay ti ay-ayam a kickboxing.
Sigun pay kenkuana, ipapati daytoy nga agaramid iti programa tapno maipaayan iti naan-anay a panakasanay dagiti atleta iti nasao a probinsya.
Namnamaen ti opisyal a nu malpas ti tallo agingga lima a tawen ket makaipakitada iti napintas a resulta nga agserbi a dalan tapno ad-adda nga umado ti suporta manipud kadagiti lokal a gobyerno ti probinsya.
Maipalagip nga idi napalabas a tawen wenno Batang Pinoy Competition 2023, nagleppas laeng iti maika-62 a posisyon ti delegasyon iti probinsya ti Benguet.//Bombo Genzel Depayso
