BAGUIO CITY – Im-imbestigaran ita ti pulisya ti pakabigbigan ti maysa a lalaki a nagtakaw iti uneg ti maysa nga apartment sadiay Lualhati Barangay, Baguio City itay laeng nabiit.
Ti nasao nga apartment ket tagikua ti pamilya Ramolete a residente iti nasao a lugar.
Maibasar iti report ti pulisya, pinanawan ti agasawa ti apartment kalpasan a naglabada ken nagawidda iti balayda a masarakan iti asideg ti apartment ken sakbayda a pimmanaw ket impasigurado ti asawa a babai a naka-lock amin a ridaw ken tawa ti pasdek.
Nupay kasta, idi nagsubli ni Mister Ramolete tapnu isimpa ti labada ket sadiay a nadiay a nadiskobrena a nadadael ti tawa ti apartment ken mapukpukaw ti flat screen television nga aggatad ti agarup nasurok P80,000 a nakamuntar iti maysa a silid sadiay.
Nakita met iti video footage ti CCTV camera a naimuntar iti apartment ti panangkalay-at ti nasaka-saka a lalaki a nakasuot iti blue maong pants, hooded sweatshirt ken facemask iti main gate ken ti panagturong daytoy iti maudi a silid.
Nakita pay ti iruruarna kalpasan ti sumagmamano a minutos nga imetna ti mapukpukaw a telebisyon.
Mapapati a nagaramat ti suspek iti grinder wenno kapada nga equipment iti panangputed daytoy iti steel window grills iti silid a nakaimuntaran ti telebisyon.
