BAGUIO CITY – Mapalpalagipan dagiti aglaklako ti ‘palaspas‘ wenno palm nga agtalinaed dagitoy kadagiti naituding a lugar ti paglakoanda bayat ti holy week iti Baguio City.
Iti interview ti Bombo Radyo kenni Daryll Kim Longid, dadaulo ti Public Order and Safety Division (POSD) – Baguio City, saanen a kasapulan nga agala dagiti palm vendor ti permit manipod iti siudad tapno makalako dagitoy laketdi addaanda ti koordinasyon kadagiti dadulo ti simbaan wenno kapilya a panggepda a pagpwestwan nga aglako bayat ti holy week.
Sigun kenni Longid, masapol a liklikan dagitoy ti sumabat kadagiti buyers iti igid ti dalan wenno kalsada gapu ta maysa daytoy a klase ti illegal peddling ken maibilbilang metlaeng a non-vehicular obstruction.
Nupay saan a tiliwen dagiti kameng ti nasao nga opisina dagiti maobserbaranda a saan nga agtultulnog ket mabalin dagitoy a mapatalaw ken saandan a makalako.
Kabayatanna, kinuna ti opisyal nga iti agdama ket awan pay ti naawatda a report mainaig kadagiti aglaklako ti palaspas iti Baguio City kagiddan paylaeng ti holyweek.//Bombo Rob Dominguez
