BAGUIO CITY – Inkalintegan ti mayor ti Baguio ti panagtalinaed ti siudad iti General Community Quarantine (GCQ) nga status agingga inton tapos.
Iti eksklusibo nga interview ti Bombo Radyo, inlawlawag ni Mayor Benjamin Magalong nga awan ti dakkel a naidumaan dagiti pagalagadan ti GCQ iti siudad ti Baguio manipud kadagiti pagalagadan dagiti dadduma a lugar a naipasidong iti Modified General Community Quarantine.
Kinunana a gapu iti daytoy ket kinednganda nga agtalinaed ti Baguio iti GCQ tapnu adda latta ti kontrol ti siudad iti panaggaraw dagiti tattao tapnu mapabuntog ti panagsangpet ti Delta variant ti COVID-19 iti lokalidad.
Impettengna a saanna a butbutngen dagiti umili ti siudad ngem napimpintas no ita paylaeng ket agsaganan ti Baguio tapnu makontrol ken mapagsaganaan ti Delta variant ti COVID-19 kagiddan ti panakailukat ti ekonomiya ken ti sektor ti turismo.
Inyunay-unay pay ni Mayor Magalong a posible ti bassit a panagngato dagiti kaso ti COVID-19 iti lokalidad gaputa tunggal aglukat ti ekonomiya ken ti sektor ti turismo ket ngumato ti mobility gapu iti panagruar ken panagpasyar dagiti adu a tattao ken turista.
