BAGUIO CITY – Impannakkel ti dadaulo ti pulisya sadiay Bakun, Benguet ti panagtalianed ti linak ken kappia sadiay ken ti kaawan ti nailistada a krimen kabayatan ti pandemya nga intunda ti COVID-19.
Sigun kenni PCapt. John Dangiwan, hepe ti Bakun Municipal Police Station, awan ti nailistada a kaso ti krimen manipud Enero agginga Hunyo ti agdama a tawen malaksid laeng kadagiti babassit nga aksidente iti kalsada a rinespondean dagitoy.
Kinunana nga idi napalabas a tawen ket tallo laeng a kaso ti nairekord-da, partikular ti acts of lasciviousness, illegal logging ken frustrated homicide.
Kabayatana, agtultuloy ti panangipalagip ti pulisya iti kanayon a panagridam dagiti motorista iti kalsada ken iti panangisiguradoda a natalged ti kondisyon ti luganda ken ti mismo a bagida sakbayda nga agbiyahe tapnu maliklikan ti aniaman nga aksidente.
Innayon pay ni Capt. Dangiwan a tutukanda ti kampanya kontra iti iligal a droga nangruna ta ado paylaeng ti agmulmula ti marijuana sadiay Bakun kas maibasar kadagiti impatungpalda nga eradication operations kadagiti napalpalabas a bulan.
