BAGUIO CITY – Italtal-o latta ti Department of Agriculture (DA) – Cordillera ti panagtaraken ti rabbit kas maysa nga alternatibo a pagbiagan dagiti agtartaraken ti baboy a naapektaran iti African Swine Fever (ASF) outbreak iti pagilian.
Sigun kenni DA-Cordillera OIC Regional Director Cameron Odsey, napintas ti rabbit a taraknen ken ilako dagiti mannalon.
Nupay kasta, inlawlawagna a saan a kasapulan a rabbit ti taraknen dagiti hog raisers no di ket mabalin met ti manok.
Dinakamatna nga immunan a nangiwarasda ti manok kadagiti agtartaraken ti baboy iti rehiyon a naapektaran iti ASF outbreak gapu ta mas kabisadoda daytoy a taraknen.
Inaklon met ni Odsey a masapul a maadal ken maipasidong iti panagsanay dagiti mannalon no kasano a taraknen ken paaduen ti rabbit tapno adda ti manamnama a mailako dagitoy.
Kinunana pay nga ad-adalenda ita dagiti mabalin a pagtaodan dagiti rabbit gaputa nangatngato ti presyo dagitoy no idilig kadagiti manok a kadawyan a tartaraknen dagiti mannalon.
