BAGUIO CITY– Nangrugin ita nga aldaw ti panagtiliw ti Land Transportation Office (LTO)-Cordillera kadagiti agangkas wenno aglubbon iti motorsiklo nga awanan iti motorcycle barriers.
Iti panakiyuman ti Bombo Radyo kenni LTO-CAR Regional Director Francis Ray Almora, kinunana a naipaayanen iti gundaway dagiti umili a mangimuntar iti barrier kadagiti motorsikloda isu’t gapuna nga awan ti rason tapno saan nga agtungpal dagitoy iti nasao a pammilin.
Sigun kenkuana, adda metten ti sumagmamano a motorsiklo a naobserbaranda anga addaan iti barrier ditoy rehiyon Cordillera.
Kabayatana, agtaltalinaed a suspendido ti Inter-provincial ken Regional Public Transport ditoy rehiyon Cordillera kabayatan ti Modified General Community Quarantine(MGCQ).
Kinuna ni Almora nga awan paylaeng ti naawatda a paabiso manipud kadagiti nagduduma a lokal a gobierno ti rehion seknan iti panakaipalubos ti panagbiahe dagiti para publiko a lugan.
Nupay kasta, kinunana nga adda laeng ti maysa nga intra-province route nga impaayanda iti special permit a mabalin nga agbiahe iti La Trinidad paturong sadiay Abatan, Buguias, Benguet.
Mainaig iti daytoy, ikonkonsidera met ita ti Tabuk City Police Office dagiti improvised a motorcycle barriers kadagiti motorsiklo.
Sigun kenni Pol/Lt. Col Radino Belly, hepe ti Tabuk City Police Office, awan paylaeng ti naidesignar a paggatangan wenno pagalaan kadagiti motorcycle barriers iti masakupanda a lugar isu’t gapuna nga itulokda nga agaramat dagiti umili iti improvised barriers basta la ketdi masurot ti pammilin ti National Inter-Agency Task Force on Emerging Infectious Diseases(IATF).
