BAGUIO CITY – Impetteng ni Councilor Mylen Yaranon a saan a dimmalan iti pinal nga panaka-aprubar ti P4 Selection Committee iti panakaipaay iti Original Proponent Status (OPS) iti SM Prime Holdings.
Iti panakiyuman ti Bombo Radyo iti konsehal, kinunana a kalpasan a nireject ni Mayor Benjamin Magalong ti Robinsons ket naipaay ti OPS iti SM idi Oktubre 14 ken diretso a naipatulod metlang iti kompanya ti memorandum idi Oktubre 15.
Inayonna nu naisubli koma iti P4 Selection Committee ti nasao nga Memorandum ket naipaayan iti gundway a matingiting dagiti solicited proposals.
Kabayatanna, pattienna a no mapaay ti negosasyon iti SM ket saanen a maituloy ti katulagan ket ad-adda nga adu ti makipaset iti Swiss Challenge.
Innayonna a tubtubngarenna ti proposal ti nasao nga kompanya gaputa awan iti social impact ti proposal dagitoy.
Imbinsa-binsana a dakkel ti epekto kadagiti mannalon, vendors ken consumers nu mapagbalin a mall ti merkado publiko.
Sigun kenkuanana, ad-adda a ngumato ti bayadan dagiti vendors a mangitunda iti nangato a presyo kadagiti consumers.
Nupay kasta, inlawlawagna a saan daytoy a kontra iti modernization ken rehabilitation ti merkado publiko gaputa nabayagen a supsuportaranna daytoy ngem nasken koma a saan nga maipaay iti mall ti panagpapintas iti daytoy.
