BAGUIO CITY – Saan a nakitaripnong dagiti lima a chicken dung operators iti naangay a public cosultation para iti panakaipalubos ti operasion dagitoy sadiay Shilan, La Trinidad, Benguet.
Sigun kenni Shilan Barangay Captain Jeffrey Maslag, nagkedked dagiti operators a makipaset iti nasao a taripnong iti baet ti inisyatibo dagiti opisyal ti barangay a mangguyugoy kadakuada tapno mapagsaritaan ti nasao a pakaseknan.
Kabayatana, imbinglayna a kabayatan ti konsultasyon ket inyebkas dagiti residente ti barangay ti saanda a panangkanunong iti operasyon ti abono sadiay.
Sigun kadagiti umili, gapu daytoy iti isyu iti salun-at ken iti aglawlaw a posible a maapektaran no maituloy pay ti operasion dagiti chicken dung dealers.
Kinuna ti kapitan a tarigagayda a mapagbalin a legal ken paikkaten dagiti nasao nga operators iti barangayda iti baet a sadiay ti kangrunaaan a pagturturongan dagiti mannalon a paggatangan ti abono.
Maipalagip nga impatangken ladta dagiti chicken dung dealers ti panagtuloy ti operasyon dagitoy sadiay Shilan, La Trinidad, Benguet iti baet ti immunan a panangiserbi dagiti otoridad iti notice of closure kadagitoy.
Kasaruno daytoy ti immunan a direktiba a maipaserra dagiti establishemento nga agilaklako ti chicken dung.
Malaksid iti daytoy, maipawil ti panakailako ti chicken dung iti masakupan ti La Trininidad kas maibasar iti ordinansa ti nasao nga ili. (report ni Bombo Florence Paytocan)
