BAGUIO CITY – Sumursurot latta dagiti Pinoy workers sadiay Taiwan kadagiti adu ken nainget a pagalagadan nga inyulog ti gobyerno sadiay tapnu makaliklikda iti COVID-19.
Iti interview ti Bombo Radyo kenni Bombo International Correspondent George Lacanlale, factory worker sadiay Taipei, Taiwan, kinunana nga adda ti polisiya ti kompanya a pagtatrabahuanna a nasken a dua laeng nga oras ti panagyanda iti ruar ti pasdek.
Likliklikanda met ti agturong kadagiti parapubliko a lugar kas kadagiti parke, hotels ken restaurants.
Inlawlawagna a saanda a kayat a maakaran iti COVID-19 gaputa no maamuan ti kompanyada ket posible a mapaawidda pagilian wenno saan ket maiparikep ti pagtatrabahuan dagitoy.
Agtaltalinaed met a kompleto ti suplay ti taraon sadiay ken face mask malaksid pay a kompleto ti medical facilities dagitoy isut gapuna a saanda a maal-alarma.
Kabayatanna, dinakamat pay ni Lacanlale nga agtungtungpal dagiti tattao sadiay kadagiti preventive measures kontra iti COVID-19 isut gapuna nga agtungtungpal met dagiti Pinoy sadiay.
Innayonna a no matiliw dagiti aglabsing kadagiti pagalagadan ti lockdown kas kadagiti saan a naka-mask a rimwar ket mamulta dagitoy iti dumanon 15,000 New Taiwan Dollar a katukad ti nasurok P25,000.
Kagiddan iti daytoy, nangibagi ni Lacanlale iti mensahe kadagiti Pilipino iti panagtungpal ken panakikaykaysa dagiti kadagiti amin a direktiba tapnu makaliklik iti COVID-19 gaputa dagitoy ket para iti pagsayaatan ti amin.
