BAGUIO CITY – Nainget ti panang-inspeksiyon ti Hotel and Restaurant Association of Baguio (HRAB) kadagiti miembro daytoy a pagdagasan ken panganan iti siudad.
Iti panakiyuman ti Bombo Radyo kenni Andrew Pinero, media relations officer ti HRAB, kinunana a gapu iti daytoy ket sigsiguraduenda a malaksid iti panagtungpal dagiti miembroda kadagiti regulasyon ti environmental agencies ti gobyerno ket ammo wenno maawatan dagitoy dagiti nasao a regulasyon.
Kinunana nga inimbitaran ti asosasyonda ni Environmental Management Bureau – Cordillera regional director Reynaldo Digamo ken daytoy ti nangipalawag ken nangipaka-awat dagiti napapateg a probisyon dagiti linteg a nainget nga ipatpatungpal dagiti ahensia ti gobyerno.
Inaklonna a daytoy ket gaputa adu dagiti property owners iti Baguio a saan a maka-ammo iti pudpudno a rason no apay a naiparikep ti Boracay Island.
Impeksana a saanda a kayat a mapasamak iti siudad ti napasamak iti nasao nga isla isyut gapuna a no adda man ti nasken a maisimpa iti tunggal pasdek iti Baguio ket nasken nga addan ti aksion nga aramiden dagitoy.
Sigun kenkuana, partikular a kayatda a maisimpa ket ti waste management ken sewerage system dagiti hotels iti siudad gaputa no dakdakkel ti pasdek ket ad-adu met ti rugit manipud iti daytoy.
Impetteng pay ni Pinero a ti umno a waste management ti susi tapnu saan a maitulad ti Baguio City iti isla ti Boracay ken ti panangipalubos dagityi hotels and restaurant iti panang-inspeksion ti inspection team kadagiti sanikua dagitoy.
