BAGUIO CITY- Impetteng ti Department of Transportation (DOTr) – Cordillera a nasken nga agserbi nga adal kadagiti amin a bus companies iti rehion ti panakaikkat ti prangkisa ken panakaipaay ti ‘show cause order’ kadagiti maseknan a kompanya ti bus a mairamraman kadagiti nagduduma nga aksidente kadagiti kalsada.
Iti panakiyuman ti Bombo Radyo kenni DOTr- Cordillera Assistant Regional Director Mohammad Nasser Abbas, kinunana a babaen kadagiti nasao nga addang ti ahensia ket sursurwen dagiti kompanya dagiti bus a mangtaripato iti lugan dagitoy.
Kinunana a naipaayan laeng iti ‘show cause order’ ti Rising Sun Bus a natumba sadiay Nakiangan, Buguias, Benguet a nagluganan dagiti 33 a tattao itay laeng nabiit.
Impalawagna a paset daytoy ti umno a proseso iti linteg tapnu maipaayan iti gundaway ti maseknan a kompanya nga agpalawag nangruna ta awan met ti pimmusay iti insidente. Dinakamatna a mismo a daytoy ti nangsitar iti driver ngem nagbiahe latta ti nasao a driver ti bus.
Naamuan a bayat ti panagdalyasat ti nasao a bus iti nalipit a kalsada ket saan a nagkurri ti steering box ti bus a nangitunda tapnu idungpar laengen ti driver ti nasao a bus iti road barrier a nagresulta iti panakatumba daytoy.
Kabayatanna, inaklon ni Abbas nga iti panaginspeksionda kadagiti terminal dagiti bus iti rehion ket adda latta dagiti nakitkitana a panaglabsing iti prangkisa a naipaay kadagitoy. Innayonna a kinasaritanan dagiti bus operators iti rehion ken sadiay a nagkiddaw dagitoy iti pawayway.
Dinakamatna a pinatganna ti nasao a kiddaw ngem inkarina nga iti kanito a matiliwna dagiti nasao a bus iti maikadua a gundaway kadagiti kalsada nga addaan ti panaglabsing ket tiliwennan dagitoy ken maipatungpal ti umno a proseso.
