BAGUIO CITY – Impasigurado dagiti agilaklako iti meat section ti Baguio City Public Market ti panagtungpalda kadagiti pagalagadan iti naideklara nga Enhanced Community Quarantine iti entero a Luzon.
Iti panakiyuman ti Bombo Radyo kadagiti vendors, kinunada a nainget nga ob-obserbaranda dagiti precautionary measures.
Kinuna ti maysa kadagitoy a regular ti panagdalusda iti aglawlaw ti paglakwanda ken ti panagaramat dagiti vendors iti mask.
Dinakamatna nga idi agsapa ket arigna nag-panic buying dagiti tattao ditoy lokalidad gaputa immado dagiti gimmatang kadagiti karne iti agingga tallo a kilo ken lima a kilo no idilig kadagiti napalpalabas nga aldaw.
Sigun kenkuana, idi rabii ket naisayangkat ti flushing iti entero a merkado publiko ken iti kalgaw ket dagusda nga agdalus no adda ti bassit a rugit iti paglakuan dagitoy.
Kabayatanna, imbingay ti nasao a vendor nga awan met ti panagbaliw iti presyo ti lako dagitoy nupay agkurang metten ti suplayda gapu iti panakalimitar dagiti al-alanda a baboy manipud Tarlac ken Pangasinan.
Maibasar iti panagmonitor ti Bombo Radyo, magatang ti karne ti baboy iti P200 agingga P250 tunggal kilo, depende iti klase bayat a ti karne ti baka ket magatang iti P320 agingga P500 tunggal kilo, depende iti klase.
Agtultuloy met ti panagwanawan dagiti pulis ken dagiti personnel ti POSD iti merkado ti siudad tapnu mangipaay met iti tulong kadagiti agkasapulan nangruna iti parikut iti transportasyon.
