Agtultuloy latta a parikut ti panagtupra ti “betel nut” wenno “moma” ken ti narugit nga aglawlaw kadagiti terminal iti siudad ti Baguio ken probinsia ti Benguet.
Iti interview ti Bombo Radyo kenni Wilson Bumay-et Jr., Jeepney Federation President ti Baguio Benguet, kinunana a pakaseknan metlaeng daytoy ti nagduduma a barangay iti Central Business District (CBD) nangruna kadagiti loading ken unloading areas gaputa makitkitada dagiti tupra a nalabbaga.
Gapu iti dayta, kidkiddawena kadagiti padana nga opisial kasta metten dagiti draybers a babalawenda dagiti agtuptupra kadagiti loading ken unloading areas.
Insuhesionna a nasaysayaat nu agitugot ti botelya dagiti agngalngalngal ti “moma” nga isut pangitupraanda iti daytoy.
Maipalagip a nagbalakad ni Mayor Benjamin Magalong iti publiko nangruna kadagiti agtuptupra ti “moma” kadagiti nagduduma a disso iti siudad ti Baguio.
Patien ni Mayor Magalong a saan laeng a pakaseknan daytoy iti kinadalus, nu diket maipapan iti salun-at, “sanitation” ken “hygiene.”
Kinunana pay a ti panagngalngal ti betel nut ket mangitunda iti kanser ti ngiwat, pannaka-adict ken saan a makaay-ayo nangruna iti ngipen ken ngiwat.
