Idagdagag ni President Ferdinand “Bongbong” Marcos Jr. kadagiti 223 a baro nga uniformed personnel a nagturpos iti Philippine National Police Academy (PNPA) “Layag-Diwa” Class of 2024 nga agusar dagitoy iti teknolohia tapno marisut wenno malabanan dagiti krimen iti Pilipinas.
Bayat ti panagbitlana iti maika-uppat a pulo ket lima a Philippine National Police Academy (PNPA) Commencement Exercises idiay Silang, Cavite, kinaritna dagitoy nga agaramat ti teknolohia a mangsalaknib kadagiti indibidual nangruna iti cybercrime.
Kidkiddawenna pay kadagitoy nga adalen a nalaing dagiti “smart policing”, “fire prevention”, ken ti “penology”.
Malaksid iti dayta, idagdagadag pay ni Marcos kadagiti nagturpos iti PNPA a naituding a makikauda iti Bureau of Fire Protection (BFP) ken Bureau of Jail Management and Penology (BJMP) nga i-maximize dagitoy ti information technology tapno mapasayaat ti pannakaipaay ti serbisio kadagiti tattao bayat a mapasabassit ti gastos.
Kadua ni President Marcos Jr ni Vice President Sara Duterte ken Interior and Local Government Secretary Benjamin Abalos Jr. iti 45th PNPA Commencement Exercises a napasamak ita nga aldaw.
